|
بتشب الدنيا
بتقفل عين وبتفتح عين
وبترمي بكل همومها عليّ
تسيبني قصادي
زي الطفل التايه فيّ
بادوّر عني وعن أحلامي
وعن مخالق الدنيا التايهه
ساعتها بتطلع مني
سماح
الواقفة ورا الشباك
بتشد حبال الشمس وتحلم
بالطيران
بتلم خيوط الصبح بإيد
والإيد التانيه بتبعد بكره
تخاف
من لحظة حزن تاخدني بعيد
وباخاف من كل الدنيا عليها
بتشوف العالم من جواها
حواديّت " جوليت "
وباشوف العالم من براي
مأساة " هاملت "
بتخش همومي ويومي
وبتشبه فيّ حاجات متفاته
وحاجات
وأنا باشبه فيها الطهر المالي عيونها
بالليل
تشاركني كتابي وترحل
ويا الحلم اللي معودنا ما يتحققش
والصبح بتشرق ويا الشمس
اللي محوطاني ساعات
وساعات بتغيب عن كل همومي
ترجع تاني
تشبه فيّ حاجات متفاته
وحاجات
يا سماح
الحلم اللي احنا بدرنا عشانه قلوبنا
بيطرح
لكن لسه ما خففنيش م الموت
فما تستحليش العزف علي الأوجاع
وتنزي بواقي الخوف جواي
باستني عيونك تبعت لي كل صباح
إشارات
فتاخدني لحد الحب النايم فيّ
فيصحي
ويشوف العالم من جواكي
ساعات
وكتير بياخدني بعيد عن نفسي
ويا الطفل التايه فيّ
أدور عني وعن أحلامي
وعن مخاليق الدنيا التايهه
فتطلع مني معاني قديمه
تقول يا سماح
الحلم اللي احنا بدرنا عشانه قلوبنا
بيطرح ..
لكن ..............
|
